Fyrir mér er kennslufræði ekki bara fræðilegt hugtak heldur eitt mikilvægasta verkfæri ökukennarans til að skipuleggja og leiða nám sem skilar raunverulegum árangri. Góð ökukennsla snýst ekki eingöngu um að undirbúa nemendur fyrir ökupróf heldur einnig um að hjálpa þeim að verða öruggir og ábyrgir þátttakendur í umferðinni. Ég lít því á ökukennslu sem samspil þekkingar, verklegrar færni, samskipta og leiðsagnar þar sem hlutverk kennarans er að styðja nemandann í gegnum allt námsferlið.

Kennslusýn eða starfskenning kennara vísar til þeirra hugmynda, gilda og viðhorfa sem móta kennslu hans og samskipti við nemendur. Hún byggir meðal annars á reynslu, þekkingu og þeirri sýn sem kennari hefur á nám, kennslu og hlutverk sitt sem leiðbeinanda. Starfskenning þróast yfir tíma og mótast meðal annars af reynslu, menntun, uppeldi og samskiptum við annað fólk. Sú reynsla hefur áhrif á hvernig kennari nálgast kennslu sína, skipuleggur nám og vinnur með nemendum sínum (Jóhanna Einarsdóttir, 2002).

Í minni kennslu hefur bakgrunnur minn í verkfræði, leiðbeiningum og tæknilegri þjónustu haft mikil áhrif á þá nálgun sem ég vinn eftir. Ég legg áherslu á skipulagða, skýra og einstaklingsmiðaða kennslu þar sem nemendur fá verkefni við hæfi og reglulega endurgjöf á framvindu sína. Kennslusýn mín byggir meðal annars á hugmyndum um samhæfða námskrárgerð þar sem hæfniviðmið, kennsluaðferðir og námsmat þurfa að styðja hvert annað (Aleksandra Hamely Ósk Kojic, 2026b). Jafnframt lít ég til hugmynda John Dewey um að nám eigi sér stað í gegnum virka reynslu og þátttöku nemenda í eigin námi (Aleksandra Hamely Ósk Kojic, 2026c). Í bílnum er nemandinn gerandi sem byggir upp þekkingu sína með því að takast á við raunverulegar aðstæður í umferðinni, sem dæmi mun ég láta nemendur mína finna tengipunkt kúplingarinnar aftur og aftur þar til þeir skynja hvernig bíllinn bregst við í stað þess að útskýra kúplinguna eingöngu fræðilega. Þannig verður þekkingin hluti af virku ferli námsins. Með hliðsjón af fjölgreindarkenningu Gardners leitast ég við að bjóða upp á fjölbreyttar nálganir í ökunáminu. Ég geri mér grein fyrir að nemendur læra á mismunandi hátt og nýti því ólíkar leiðir til að dýpka skilning þeirra á umferðinni, þannig getur það hjálpað einum að horfa á viðfangsefni umferðarinnar með augum heimspekinnar en annars með nálgun frásagnarinnar (Ingvar Sigurgeirsson, 2013).

   Í ökukennslu skiptir miklu máli að nemendur skilji tilgang verkefna og geti tengt bóklegt nám við verklega reynslu í akstri. Ég legg því áherslu á skýrar útskýringar, reglulega endurgjöf og verkefni sem byggja smám saman upp færni og sjálfstæði nemandans.

Kennslan hjá G. Hall ökukennslu byggir á þeirri hugmynd að traust, öryggi og áhugahvöt séu lykilforsendur árangursríks náms. 

• Traust

Góð verkleg kennsla veltur á því að skapa andrúmsloft þar sem nemandanum finnst þægilegt að spyrja spurninga, gera mistök og ræða eigin óöryggi án þess að óttast gagnrýni. Í glærum námskeiðsins kemur fram að góð samskipti byggi á öryggi, virðingu og virku samtali milli kennara og nemenda. Ég legg mikla áherslu á virka hlustun, jákvæð samskipti og uppbyggilega endurgjöf þar sem nemandinn finnur að markmiðið sé að hjálpa honum áfram í náminu en ekki aðeins að benda á mistök.

• Öryggi

Sem verkfræðingur og ökukennari er öryggi mér efst í huga. Það á bæði við um öryggi í umferðinni sjálfri og það sálfræðilega öryggi sem þarf að vera til staðar inni í bílnum. Nemendur læra best þegar þeir upplifa stuðning og fá svigrúm til að þróa færni sína á eigin hraða. Í kennslu minni nýti ég meðal annars hugmyndir úr MUSIC-módelinu eftir Jones þar sem lögð er áhersla á að nemendur upplifi stuðning, tilgang með verkefnum, trú á eigin getu og raunhæfan árangur í náminu. Ég tel mikilvægt að nemendur upplifi að mistök séu eðlilegur hluti af námsferlinu og að þau séu notuð til lærdóms fremur en gagnrýni.

• Áhugahvöt og virk þátttaka

Ég tel að nám verði bæði árangursríkara og varanlegra þegar nemendur hafa áhuga á því sem þeir eru að læra og taka virkan þátt í eigin námi. Því legg ég áherslu á fjölbreyttar kennsluaðferðir, skýrar kveikjur og verkefni sem tengjast raunverulegum aðstæðum í umferðinni. Ingvar Sigurgeirsson (2013) hefur bent á mikilvægi fjölbreyttra kennsluaðferða í námi og að ólíkir nemendur læri á mismunandi hátt. Í kennslunni leitast ég við að brjóta upplýsingar niður í skýr og aðgengileg skref þannig að nemendur geti byggt upp skilning og sjálfstraust jafnt og þétt.